Deu 24 | ZomZIV | STEP | Pasal khatin numei khat tenpih a, ama tungah lungkimlohna khat mu in, makna lai gelhin pia-a, a inn pan tuanu paikhiasakin;

Deuteronomy 24

1 Pasal khatin numei khat tenpih a, ama tungah lungkimlohna khat mu in, makna lai gelhin pia-a, a inn pan tuanu paikhiasakin; 2 ama inn tuanu in a nusiat khit ciangin midang khat zi suak leuleu-a; 3 a pasal nihna in zong amah deih lo leuleu-a, makna lai gelhin pia-in, a inn panin sawlkhia ahikeh a pasal nunung si leh 4 tua ciangin tua a buahsa numei pen a masa a pasal masa in a tenpih kik ding a kiphal kei hi. Tua in TOPA muhna ah a kihhuai hi. TOPA note Pasian in na luah dingun hong piak ding gamah mawhna na tun kei ding uh hi. ^a

5 A zi nei tung mi khat gal sungah kikuansak loin ama nasep ding khatpeuh a kisuan kei ding hi. A laksa a zi tawh a lungdam khawm nadingin inn ah kum khat sung a om ding hi. ^b

6 Leiba khat khapna in - angawina suang kop khat genloh - a tungnung pen nangawn la kei un, bang hang hiam cih leh khapna-in nuntakna a laksak na suak ding uh hi.

7 Mi khat in ama sanggam Israel-te gusimin sila in khawi ahikeh zuak-a, a kimat leh a gupa a si pelmawh ding hi. Note lak panin gitlohna na beimangsak pelmawh ding uh hi.

8 Phak ^{▼▼24.8 Hebrew kammal ah vun natna tuamtuamte a kizang kammal hia-a} natna tawh kisai-in Levi siampite hong lamlah bang tektekin limtakin hih un. Amaute ka thupiak bangin note in na zui pelmawh ding uh hi. 9 Egypt pan na paikhiat khitun lampi ah TOPA note Pasian in Miriam tungah bang hih ahi hiam phawk un.

10 Na nam khat peuhpeuh na vengpa na leitawisak ciangin kiciamna khatpeuh bawlsak dingin a inn ah pai kei in. 11 A pua ah om inla, na leitawisakpa a kiciamna kipiakhiasak in. 12 A mipa a zawng ahileh a neihsa le a kiciamna zantamsak kei in. 13 Nitum ma-in zana a luppih dingin a puantualpi pia kik in. Tua hileh amah nang tungah lungdam dinga, tua in TOPA note Pasian muhna ah thumaana gamtatna ahi hi. ^d

14 A zawng a cimawh nasema na cialte uh, na sanggam Israel-te ahi-a, na khuapite uh khatpeuh a teng pemtate ahi zongin nopneh kei un. 15 A thaman nitum ma-in pia un, bang hang hiam cihleh amah zawnga, tua tung bek a kinga ahi hi. Tua hi keileh TOPA tungah hong khia dinga, mawh na tang ding hi. ^e

16 A tate uh tangin pate kithat lo dinga, a pate uh tangin tate a kithat kei ding hi; amau mawhna hangin amau mah si ciat ding uh hi.

17 Pemtate le pa nei lote’ thutang na kawngheksak kei ding uh a, meigongnu kiciamna tangin a puantual na laksak kei ding uh hi. 18 No zong Egypt ah sal suakin TOPA note Pasian in tua lai pan hong tatkhiat lam phawk un. Hihte na sep dingun thu kong piakna tua hang ahi hi.

19 Na lo uah an la-in buhphal na khop uh ciangin na nunguah an sang zongkik kei un. TOPA note Pasian in na khut panun a piang khempeuh thupha a piak theih nadingin, pemtate, pa nei lote le meigongte adingin nusiat un. 20 Na singkungte panun olive na sat uh ciangin a hiang kawm nihvei zong kei un. A omlaite pemtate, pa nei lote le meigongte adingin nusia un. 21 Na lenggui lo uah lenggah na lak uh ciangin na nusiat khakte uh khawm kik kei un. A om laite pemtate, pa nei lote le meigongte adingin nusia un. 22 Egypt ah salin na om lai uh phawk un. Hihte na hih dingun thu kong piakna tua hang ahi hi.